ភ្នំពេញ៖ គោលនយោបាយជាតិស្ដីពីប្រព័ន្ធការពារកុមារឆ្នាំ២០១៩-២០២៩ និងផែនការអនុវត្តគោលនយោបាយជាតស្ដីពីប្រព័ន្ធកិច្ចការពារកុមារ ដែលត្រូវបានដាក់ឱ្យអនុវត្តកាលពីថ្ងៃទី២៩ ខែកញ្ញា ត្រូវបានអគ្គលេខាធិការដ្ឋានក្រុមប្រឹក្សាជាតិដើម្បីកុមារ សហការជាមួយអង្គការភ្លែនអន្តរជាតិកម្ពុជារៀបចំសិក្ខាសាលាផ្សព្វផ្សាយលើកកម្ពស់ការអនុវត្តន៍នៅថ្ងៃនេះ ក្រោមអធិបតីរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត ព្រមទាំងសមាជិក សមាជិកា ក្រុមប្រឹក្សាជាតិកម្ពុជាដើម្បីកុមារ។

គោលនយោបាយជាតិស្ដីពី ប្រព័ន្ធកិច្ចការពារកុមារឆ្នាំ ២០១៩-២០២៩ ត្រូវបាននាយករដ្ឋមន្ត្រីកម្ពុជា សម្ដេចតេជោ ហ៊ុន សែន ដាក់ឱ្យប្រើប្រាស់នៅថ្ងៃទី ២៩ ឧសភា ឆ្នាំ២០២០ និងត្រូវបានដាក់ឱ្យអនុវត្តកាលពីថ្ងៃទី២៩ ខែកញ្ញា ឆ្នាំ២០២១ គោលនយោបាយនេះ ផ្ដោតលើសសរស្ដម្ភចំនួន៣គឺ បង្ការនិងទប់ស្កាត់ អន្តរាគមន៍ និងការផ្ដល់សេវាឆ្លើយតប ដល់កុមារដែលកំពុងស្ថិតក្នុងហានិភ័យសេដ្ឋកិច្ច កុមាររងគ្រោះ និងងាយរងគ្រោះ ដែលបាននិងកំពុងទទួលរងនូវការជួញដូរ ការរំលោភបំពាន់ ការកេងប្រវ័ញ្ចផ្សេងៗ និងអំពើហិង្សាគ្រប់ទម្រង់៕